Plaetse
[790] Olijfboomen wassen gheerne in drooghe valleyen/ oft op cleyne neere huevelkens/ ende worden in Spaengien Italien ende andere dyerghelijcke landen al om ghevonden.
Naem
Die Olijfboom heet in Griecx Elaea/ In Latijn Olea/ In Hoochduytsch Oelbaum und Olivenbaum/ In Franchois ung Olivier.
Die vrucht wordt in Griecx oock Elaea ghenaemt/ In Latijn Oliva/ ende daer naer in Duytsch een Olive/ ende in Franchois une Olive.
Oliven die in pekel gheleyt ende ghesouten sijn heeten in Griecx Colymbades ende Halmades/ ende in Latijn Colymbadae.
Natuere
Die bladeren ende ionghe scuetkens van den Olijfboomen sijn cout drooghende ende tsamen treckende van natueren.
Die onrijpe Oliven sijn oock cout ende tsamen treckende/ maer als sy rijp sijn/ zoo verwermen sy ende maken vochtich.
Olie van den onrijpen Oliven es cout ende tsamen treckende/ van den rijpen/ werm vochtich ende subtijl van substantien.
Cracht ende werckinghe
A Die bladeren van den Olijfboom sijn goet tot dat wildt vier/ quade voortsetende sweeringhen ende ulceratien/ ende tot andere hittighe swillinghen daer op gheleyt.
B Die selve bladeren met huenich vermenght/ maken die vuyle sweeringhen suyver ende reyn/ ende doen oock andere quade
vergaderinghen sceyden ende vergaen.
C Item die bladeren van Olijfboomen sijn goet tot die sweeringhen/ apostumatien/ puysten ende verhittinghen van den mont
ende van dat tantvleesch/ sonderlinghe van den ionghen kinderen/ in water ghesoden ende daer mede die mont ghespoelt.
D Tsap van den Olijfbladeren stelpt die vloet van den vrouwen ende alle bloetganck/ ende dijsghelijcx oock den loop des buycx ende dat root melizoen/ van binnen ende van buyten ghebruyckt.
E Tselve sap es oock goet tot die roodicheyt verhitheyt ende sweeringhen van den ooghen/ ende tot die loopende ende draghende ooren/ met collyrien daer toe dienende vermenght.
F Die Olijven die noch gruen ende onrijp sijn/ verstercken die maghe ende maken appetijt ende lust om eten/ sonderlinghe die ghesouten sijn/ maer selve worden sy seer qualijcken verteert en gheven gheen voetsels.
G Die rijpe vette Olijven maken walginge ende berueren die maghe/ sy maken hooft sweer ende sijn quaet voor den
ooghen.
H Olie van onrijpen Olijven bedwinckt ende doet sincken die ierst beghinnende heete swillinghen ende apostumatien/ ende vercoelt die heete sweeringhen ende ulceratien.
I Item dese gruene onrijpe olie es oock goet tot die vuyle stinckende sweeringhen ulceratien ende vochticheden van dat
tantvleesch/ ende maeckt die tanden vast/ met cattoen oft teer wolleken tseghen dat tantvleesch gheleyt.
K Olie van rijpen Olijven/ maeckt slap/ versuet pijne ende weedom/ doet sincken die gheswillen/ ende |