Deel 6 Van der boomen, haghen, ende alle houtachtighe gewassen, en van huerder vruchten, gummen ende sapen ondersceet, fatsoen, naem, natuere, cracht ende werkinghe PlantenAlfabetisch
Acacia es een stekende ende boomachtich ghewas/ maer niet recht op wassende/ draghende veel tacken die met scerpe dorenen beset sijn. Sijn bloemkens sijn wit. Tsaet es breet ghelijck een Lupine/ ende wast in langhe hauwen/ ende daer uut perstmen dat sap/ dat swert es ende oock Acacia gheheeten wordt.
Plaetse
Acacia wast in Egypten als Dioscorides scrijft.
Naem
Dit stekende ghewas wordt gheeten in Griecx ende in Latijn Acacia/ ende anders gheenen naem es ons bekent. In die Apoteken eest oock onbekent/ hoe wel nochtans dat die naem daer ghebleven es/ die in die Apoteke ghegheven wordt den sape van wilde pruymkens dat onrechtelijck Acacia gheheeten wordt.
[742] Acacia ende sonderlinghe dat sap dat van den ouders ghebruyckt es gheweest/ es drooghe in den derden graedt/ ende cout tot in den iersten/ als Galenus scrijft.
Cracht ende werckinghe
A Tsap van Acacia stelpt den loop des buycx/ ende die overvloedighe natuerlijcke cranckheyt van den vrouwen/ ende het doet
die moeder die ghesoncken es in huer plaetse comen/ ende vast houwen/ met rooden wijn ghedroncken.
B Dit sap es goet ghestreken ende ghebruyckt op dat wilt vier ende op alle heete swillinghen ende sweeringhen/ ende dijsghelijcx oock tot die heete puysten des monts.
C Acacia es oock een goede medecijne voor die ooghen/ ende geneest die roode gheswollen ende veerde uutstaende ooghen
daer op ghestreken.
D Acacia maeckt dat hayr van den hoofde swert/ alsmen thayr wascht met dat water daer Acacia in gheweyckt es.
E Die bladeren ende ionghe scuetkens van Acacia/ maken die leden die uut huer ioncturen gheweest hebben vast ende sterck/ alsmen die leden stooft met den watere daer sy in ghesoden sijn.