[667] nu ter tijt Cression. In Hoochduytsch Kresz und Garten kresz. In Neerduytsch Kersse. In Franchois Cresson.
Natuere
Kersse es heet ende droogh tot schier in den vierden graedt/ sonderlinghe dat saet ende cruyt alst drooghe es/ want noch groen wesende/ zoo en eest zoo drooghe noch oock zoo heet niet.
Cracht ende werckinghe
A Kersse in tsalaet/ ende met die Lattouwe ghebruyckt/ es van crachten der Raketten ghelijck/ ende es seer goet met die coude cruyden inghenomen/ maer alleen ghebruyckt beruert sy de maghe/ ende doet huer letsel/ aenghesien dat sy te heet ende te scerp es.
B Tsaet van Kersse inghenomen doet camerganck hebben ende doodet ende iaecht af die wormen/ het maeckt die milte cleyn/ het verweckt oock die natuerlijcke cranckheyt van den vrouwen/ ende doet die secondine ende doode vruchten lossen.
C Tselve saet es oock goet tseghen die slanghen ende fenijnnighe ghedierten/ ende veriaecht die selve met sijnen roock alst ghebrant wordt.
D Tsaet van Kersse met hoendersop oft eenighe andere dyerghelijcke vochtighe spijse inghenomen/ doet die taeye fluymen die op die borste ligghen rijpen ende lossen.
E Tselve saet vermenght met huenich gheneest die verherde milte/ het doet vergaen alle quade ruydicheyt ende scorftheyt/ het verdeylt ende doet sceyden alle coude gheswillen/ ende het belet dat uutvallen van den hayre/ daer op ghestreken.
F Tot dat sciatica/ dat es pijne ende weedom in die hopen/ ende tot die verouderde pijne van den hoofde/ ende tot alle coude verouderde ghebreken es dat saet van kersse oock goet met azijn ende huenich vermenght ende daer op gheleyt.
G In somma Tsaet van kersse es den sade van Mostaert van crachten ende werckinghe seer ghelijck als Galenus scrijft. |