Water ponghen heeft ronde vette stelen met veel tacxkens ende sijde scueten/ daer aen wassen vette dicke bladeren/ den bladeren van Porceleyne niet seer onghelijck/ maer ronder/ bruynder/ ende fat gruender/ die alsmense in stucken wrijft/ goeden rueck uutgheven. Op dopperste van den stelen ende sijde tacxkens wassen veel schoone blauw bloemkens/ den bloemkens van Guychelheyl niet seer onghelijck. Die wortel es wit ende veeselachtich.
Plaetse
Dit cruyt wast aen die canten van den grachten ende van den staenden wateren/ somtijts oock van den Rievieren/ ende groeyet vast aen dwater alzoo dat dickwijls van den water overvloeyet wordt.
Tijt
Water ponghen bloeyen in Meye ende in Braeckmaent.
Naem
Dit cruyt wordt gheheeten in Griecx ende in Latijn Cepaea/ nu ter tijt van sommighen Anagallis aquatica ende Becabunga. In Hoochduytsch Wasserpunghen/ Bachpunghen oder Punghen/ Hier te lande Waterponghen. In Franchois Berle.
Natuere
Dit cruyt es werm van natueren tot schier in den tweeden graedt.
[617] A Die bladeren van Waterponghen met wijn ghedroncken sijn goet tseghen die couwpisse ende droppelpisse/ ende tseghen die scorftheyt van der blasen van binnen/ sonderlinghe als sy met den wortelen van Coraelcruyt inghenomen worden.
B Die bladeren van desen cruyde worden oock met olie ende azijn gegeten/ ende sijn een goede ende bequaeme spijse den ghenen die qualicken water lossen/ ende van den graveel sieck sijn.