1554/1557: Bocxcruyt, Herbe de bouc, Tragium, Tragium Germanicum, Vulvaria
Dit cruyt es oock den Melden van fatsoene ende wesen wat gelijck/ maer in alder manieren veel minder/ het es een cleyn neer teer cruyt/ met vele tacxkens lancx der aerden cruypende. Die bladerkens sijn cleyn wit schijnende met meel bestroyet te wesene/ den bladeren van Melde ghelijck maer veel mindere/ ende niet veel meerder dan die bladerkens van Edel marioleyne. Tsaet es cleyn ende wit ende wast tsamen in een ghedronghen gelijck aen die wilde Melde. Ende dit heel cruyt es van eenen seer stinckenden rueck/ ghelijck verrotten visch/ oft stinckende vischsop/ oft ghelijck eenen vuylen bock rieckende.
Plaetse
Dit cruyt wast hier te lande by den weghen/ op sandachtighe plaetsen.
Tijt
In dmiddel van den zoomer worddet met bloemen ende met saet ghevonden.
Naem
Dit cruyt en heeft gheenen sonderlinghen naem in Latijn/ ende daer om hebben wy tselve om sijnen vremden stanck/ in Griecx ende in Latijn Tragium/ dat es Bocxcruyt ghenaempt ende wantmen oock noch twee andere Tragia by Dioscoridem vint/ zoo hebben wy dit tot ondersceet van dyen Tragium Germanicum gheheeten. Van sommighen wordt dit cruyt oock Vulvaria ghenaemt/ ende met dyen naem eest onder die cruytliefhebbers