[575] Cleefcruyt heeft vele cleyne viercantighe rouwe stelen/ met vele ledekens/ daer aen wassen langhe smalle bladerkens/ rontsomme die ledekens sterrewijs gheset ghelijck aen die Rotte/ maer veel minder ende rouwer/ ende van dese selve ledekens wassen andere ghelijcke steelkens/ draghende cleyne witte bloemkens/ ende daer naer/ ront rouw saet/ meest twee op een steelken. Dit heel cruyt met stelen bladeren ende saet blijft al om aenhanghende als aengheruert wordt/ ende es zoo rouw dattet over die tonghe ghestreken/ die tonghe doet bloeyen.
Plaetse
Dit cruyt wast al omme ontrent die tuynen haghen en hegghen.
Tijt
Het bloeyet ende brenght sijn saet voort/ alle den zoomer duer.
Naem
Dit cruyt wordt gheheeten in Griecx Aparine/ ende van sommighen Philantropos en Omphalocarpos. In Latijn Aparine. In Hoochduytsch Klebkraut. In Neerduytsch Cleef cruyt. In Franchois Reble ou grateron.
Natuere
Cleefcruyt es werm ende drooghe van natueren.
Cracht ende werckinghe
A Tsap van die bladeren ende saet/ van Cleefcruyt es goet ghedroncken tseghen die beet ende steeck van die fenijnnighe
ghedierten.
B Tselve sap in die ooren ghedruypt gheneest die pijne ende weedom der ooren.
C Dit cruyt ghestooten stelpt dat bloet op die versche wonden gheleyt/ ende met verkens liese vermenght/ verteert ende doet sceyden die croppen en clieren aen den hals daer op gheleyt. |