[503] sommighen Asia/ van anderen oock Farrago/ hoe wel dattet gheen oprechte Farrago en es want Farrago es dat van Gersten/ Vitsen ende dyerghelijcke onder een/ tot voeder van den beesten gesaeyet wordt datmen maeyet eer dat rijp wordt ende groen den ossen/ koeyen/ peerden/ ende dyerghlijcke beesten te eten geeft.
Ende dat dit coren gheen Siligo en es hebben wy met langhe ende veel redenen in onse Latijnsche Historia frugum bewesen.
Natuere
Rogghe van buyten tlichaems ghebruyckt es werm ende drooghe tot in den tweeden graedt.
Cracht ende werckinghe
A Tmeel van Rogghe met een sacxken om thooft gheleyt/ versuet die oude pijnen van den hoofde ende drooght die herssenen.
B Heefdeech van Rogghe meel/ treckt doornen ende splinters uut/ ende doet alle gheswillen ende apostumatien rijpen ende
uutbreken. Ende doet dat selve stercker dan dat heefdeech van Terwe meel.
C Tselve doet oock dat Rogghen broot met boter vermenght/ maer niet soo sterckelijk als dat heefdeech.
D Rogghen broot es swaer ende quaet om verteeren ende dient alleen den ghenen die arbeyden ende die luttel leech oft stil sijn/ oft anders sterck van maghen sijn. |