[496] Spelte es met halmen/ knoopen ende aren den Terwen seer ghelijck/ alleen sijn coren oft graen en es niet naeckt ghelijck dat terwe coren/ maer leet in vellekens besloten/ uut den welcken dattet niet lichtelijcken en rijst/ maer met muelenen oft andere instrumenten daer af ghesuyvert moet worden. Ende als dat Spelte coren van sijn caf ende buysten alzoo ghesuyvert es/ dan eest eenen suyveren Terwe coren seer ghelijck van fatsoene/ ende oock van natueren alzoo dat wanner die Spelte ghepelt ghesaeyet wordt/ die selve binnen drije iaren in claer Terwe verandert/ als Plinius/ Theophrastus ende meer andere ouders scrijven.
Plaetse
Spelte groeyet gheerne in goede vette wel gheboude aerde ende op hooge claere velden/ ende es hier voortijts alleen by den Griecken ghevonden gheweest/ nu ter tijt wast sy tot veel plaetsen van Italien/ Duytschlant/ Vranckrijck ende oock in Neederlandt.
Tijt
Spelte wordt ghelijck die Terwe in Herfstmaent oft Wijnmaent ghesaeyet/ In Hoymaent es sy rijp ende tijdich.
Naem
Dit graen wordt ghenaempt in Griecx Zea ende Zeia. In Latijn by den ouden Romeynen Semen/ nu ter tijt Spelta. In Hoochduytsch Speltz ende Dinckelkorn. In Neerduytsch Spelte. In Franchois Espeaultre.
Natuere
Spelte es van natueren der Terwe ghelijck maer wat couder/ naer die natuere van der Gherste treckende ende saechtelick drooghende.
Cracht ende werckinghe
A Tmeel van Spelte met rooden wijn es goet tseghen die beeten ende steken van den scorpioenen/ ende den ghenen die bloet
spouwen.
B Tselve meel met suete boter oft versch ruet van gheyten/ versuet die rouwicheyt van der keelen ende den hoest.
C Dit meel met wijn ende salpeeter gheneest die loopende ende draghende sweeringhen/ die witte scelferinghen van der huyt ende die pijnen van der maghen/ voeten ende van der vrouwen borsten.
D In somma/ Spelte es der Terwen van crachten seer ghelijck/ ende es een goet ende bequaem voetsel voor den menschen ende
voor alle ghedierten als Theophrastus seyt.
E Ende dat broot daer af ghemae |