[440] Boomvaren heeft bladeren ontrent een spanne lanck die tot den middelsten ribbeken toe ghesneden sijn maer niet rontsomme ghekerft. Die wortel es schier eenen vingher dick/ ende seer lancx die eerde cruypende vele bladeren voortbringhende/ van buyten bruyn/ van binnen gruenachtich met veel aenhanghende hayrachtighe faselinghen. Ende dit gheslacht van Varen en heeft oock gheen stelen noch bloemen noch saet.
Plaetse
Boomvaren wast aen die hooghe canten van den velden aen die wortelen van den boomen/ en sonderlinghe van den eycken. Ende
somtijts oock op die oude Wilghen ende op die daken ende oude mueren.
Tijt
Boomvaren behout zoomer ende winter sijn bladeren/ maer in Aprill zoo brenghet nieuwe voort.
Naem
Dit cruyt wordt gheheeten in Griecx Polypodion. In Latijn Filicula en Polypodium. In Hoochduytsch Engelsusz Baumfarn/ en
Dropffwurtz. In Neerduytsch Boomvaren ende van sommighen Eyckenvaren. In Franchois Polypode.
Natuere
Die wortel van Boomvaren es drooch tot in den tweeden graedt.
[441] A Die wortel van Boomvaren verweckt tot camerganck ende iaecht af die swaere melancholieuse vochticheden ende die taeye
fluymen ende es seer goet tseghen dat colica/ dat es weedom in den buyck/ verhertheyt ende verstoptheyt van der milte/ ende tot die vierdedaechse cortsen sonderlinghe als zy met Epithymum inghenomen wordt.
B Ende dese wortel salmen sieden in suet vleeschsop oft capoenen sop oft in water met Maluwe oft Beete ende wat Anijs saets/ ende dat drincken/ oft die selve ghepoedert met huenich water dat es Meede innemen.
C Die wortel van Boomvaren verteert ende doet sceyden dat overvloedich quaet vleesch dat in die gaten van den nuese wast Polypus gheheeten alsmense ghepoedert dicwils in die neuse doet.
Verkiesinghe
Die wortel van Boomvaren dat aen die wortelen van den eycken wast es dat beste ende bequaemste tot den ghebruyck der medecynen/ ende wordt ghenaemt Polypodium quercinum.