Plaetse
[390] Dit cruyt wast in Brabant op sommighe neere vochtighe beempden/ ende in sommighe donckere lomberachtighe plaetsen.
Tijt
Dit cruyt bloeyet in Braeckmaent ende in Hoymaent.
Naem
Dit cruyt wordt in Griecx gheheeten Helleborine/ om dattet den witten Helleborus van fatsoene ghelijck es. In Latijn Epipactis. In Duytsch wildt wit Niescruyt. Eenighe meynen dat Helleborine een cruyt es alleen van crachten ende niet van fatsoene den Helleborus ghelijckende/ ende die selve en souden dit cruyt voor gheen Helleborine willen houden/ maer haer meyninghe wordt daer aen valsch ghevonden dat noch Galenus noch Dioscorides der Helleborine eenighe cracht van Helleborus toe scrijven.
Natuere
Dit cruyt es werm ende drooch van natueren.
Cracht ende werckinghe
A Helleborine ghesoden ende ghedroncken opent die verstopte lever ende es seer goet den leversuchtighen ende die eenich fenijn inghenomen hebben oft van fenijnnighen ghedierten ghebeten sijn. |