Die ierste bladeren van Gentiaen sijn groot ende breet ende ligghen op der aerden uutghesprayet/ den bladeren van grooten Wechbreen schier ghelijck/ ende tusschen desen coemt die steel die ront/ effen/ hol/ knoopachtich/ vinghers dick ende somtijts een mans lengde hooch es/ met minderen ende som rontsomme ghekerfde bladerkens becleet. Die bloemen sijn geel. Tsaet es breet ende plat ghelijck tsaet van Angelica maer veel minder/ den sade van Vilieren niet onghelijck. Die wortel es
lanck/ ront/ buyten eerdtverwich/ van binnen geel seer bitter van smaecke.
Boven die voorghescreven Gentiaen zoo
vindtmen noch twee andere gheslachten ende soorten van cruyden/ die oock nu ter tijt voor Gentianen ghehouden worden.
[368] 2 Dat eene es der Gentiaen in alle manieren ghelijck/ maer mindere ende dracht blauw bloemen/ ende es van smaecke veel bitterder ende daer om oock als Hieronymus Tragus seyt van werckinghe veel crachtigher.
3Dat ander heeft dunne ronde stelen/ met gruenen effenen langhen smallen bladeren becleet altijt twer tseghen den ander ghesedt/ op dopperste van welcken stelen licht blauwe scellekens wassen wat cleynder dan die bloemen van Cueckenscelle. Die wortel es geel lanck ende bitter.
Plaetse
Gentiaen wast op hooghe gheberchten ende in sommighe dalen onder dat Varencruyt/ ende wordt tot veel plaetsen van Duytschlant ende in Bourgoingien veel ghevonden.
Tijt
Gentiaen bloeyet in Braeckmaent/ ende in Hoymaent oft Ooghstmaent wordt huer saet rijp.
Naem
Gentiaen wordt gheheeten in Griecx Gentiane. In Latijn ende in die Apoteke Gentiana, van Apuleius Aloe Gallica, Narce, Chiromon, Basilica, Cyminalis. In Hoochduytsch Entzian/ Bitterwurtz. Hier te lande Gentiaen. In Franchois Gentiane.
Oirsake sijns naems
Gentius Coninck van Illyrien heeft dit cruyt ierst ghevonden ende tot den gebruyck der medecynen ghebrocht/ ende daer om worddet naer sijnen naem Gentiana ghenaempt.
Natuere
Die wortel van Gentiane es werm ende drooch tot in den derden graedt.
Cracht ende werckinghe
A Die wortel van Gentiaen ghepoedert een half loot swaer met wijn luttel pepers ende Wijnruyte ghedroncken/ es seer goet den ghenen die van eenighe fenijnnighen rasende oft verwoede ghedierten ghebeten oft ghesteken sijn/ ende den ghenen die eenich fenijn inghenomen hebben.
B Die selve wortel met water ghedroncken es seer goet den leversuchtighen ende die cranck ende weeck van maghe sijn/ ende zy doet die spijse verteeren en in blijven/ ende es seer goet tot den couden ghebreken der inwendigher leden ghebruyckt.
C Tsap van den wortelen gheneest die pijne ende weedom in die sijde ende es seer goet den ghenen die ghevallen gheslaghen van binnen gheborsten oft ghequetst sijn/ want het doet dat gheronnen bloet sceyden/ ende gheneest die plaetsen die ghequetst sijn.
D Die wortel van Gentiaen heylt oock die diepe voorts etende wonden/ ende sonderlinghe dat sap daer in ghedaen.
E Dit selve sap versuet oock die pijne ende hitte der ooghen met een doecxken daer op gheleyt/ ende suyvert alderhande
mismaecktheyt ende plecken van der huyt des menschens li