[355] die Christwortel ende sterck van ruecke.
Plaetse
Swaluwortel wast op rouwe hooghe sandachtighe gheberchten ende op steenachtighe plaetse/ ende wordt in Duytschlant vele ghevonden/ sonderlinghe in Schwartzwaldt ende in Waszgauw.
Tijt
Dit cruyt bloeyet in Braeckmaent/ ende levert sijn saet in Ooghstmaent.
Naem
Dit cruyt wordt gheheeten in Griecx ende in Latijn Asclepias/ van sommighen Cission, Hederula, Cissiphyllon ende Hederae folium/ ende nu ter tijt Hirundinaria. In Hoochduytsch Schwalbenwurtz. In Neerduytsch Swaluwortel.
Oirsake sijns naems
Dit cruyt heeft sijnen naem naer den ouden Esculapius die in Griecx Asclepios ghenaempt wordt. Dien den Griecke ende Heydenen toe scrijven/ dat hy die ierste geweest es die de conste der Medecynen ghevonden heeft/ ende daer om oock voor een god van den selven ghehouwen ende gheeert.
Natuere
Swaluwortel es werm ende drooch van natueren ende subtijl van substantien.
Cracht ende werckinghe
A Die wortel van dit cruyt in water ghesoden ende ghedroncken verdrijft dat crimpsel ende weedom in den buyck/ ende es seer goet den ghenen die van eenich fennijnich ghedierte oft van eenen verwoeden hont ghebeten sijn/ niet alleen als voor inghenomen/ maer oock van buyten daer op gheleyt.
B Die bladeren ghestooten sijn seer goet gheleyt op die quade sweeringhen van den borsten ende van die moedere. |