Glaucium es een ghedroocht sap van eencruyt in Syrien by Hierusalem wassende/ dat bladeren heeft den bladeren van geelen Huel ghelijck maer vetter/ op der aerden uutghespraeyt swaer van ruecke ende bitter van smaecke vol geel saps dat uutghedout ende ghedroocht wordt.
Naem
Dat sap heet in Griecx ende in Latijn Glaucium/ van den Arabenschen meesters Memith ende Memitha/ ende desen naem es in die Apoteke bekent/ hoe wel nochtans dat/ dat oprecht Glaucium daer niet ghevonden en wordt/ want die Apotekers die duer groote ontwetentheyt ende vermeetentheyt deen voor dander stoutelijck nemen ende cleyn werck maken van/ niet alleen die siecken/ maer oock die medecijns cleyne kennisse van desen dinghen den cruyden aengaende hebbende/ te bedrieghene ende met bueselen die hant te vullene/ nemen voor doprecht Glaucium som tsap van groote Gouwe/ dat den Glaucium om sijne geelicheyt mach ghelijck sijn/ maer van natueren ende crachten heel contrarie es/ ende som tsap van den geelen Huel die zy valschelijcken Memitha heeten.
Wat wonder eest dan dat die Medecijns in huere ordonnantien dwerck altijt niet en vinden dat zy hopen ende meynen/ als sy aldus duer die ongheleerde Apotekers bedroghen worden? Daer ombehoort een goet ende neerstich medecijn die der siecken die hem bevolen sijn ghesontheyt ende welvaert soeckt/ sijne drancken ende medecijnen daer hy die siecke mede hopet te helpene/ tselve te maken oft in sijn huys te doen maken/ ghelijck Hippocrates/ Galenus ende alle oude experte meesters ghedaen hebben/ oft immers ten minsten neersticheyt te doene om die kennise van alle cruyden ende drooghen te hebbene/ op dat zy van den ongheleerden Apotekers nietbedroghen ende huer siecken niet gheabuseert en worden.
Natuere
Glaucium es cout van natueren ende tsamen treckende.