[341] vermenght gheneest die quade scorfticheyt des hoofts/ ende dat uutvallen des hayrs/ ende doet nieuwe hayr comen ende groeyen niet alleen op thooft oft plaetsen daer thayr uutghevallen es/ maer doet oock den baert die spade by coemt/ vroech voortcomen ende seer wassen/ in der selver manieren ghebruyckt.
D Euphorbium met olie vermenght ende in den slaep van den hoofde ghestreken maeckt die gene wacker die met swaeren slapen ende rasernien bevanghen sijn. Ende in den neck ghestreken doet het die spraecke die van der popelsie verloren es wedercomen.
E Euphorbium met azijn vermenght verdrijft ende neempt af alle leelicke vlecken en plecken van der huyt/ sonderlinghe die witte scellen ende scelferinghen der selver.
Hindernisse
Euphorbium om sijnder seer heete natuere es van binnen tlichaems inghenomen seer quaet der lever/ maghe/ ende alle inwendighe leden die selve onstekende ende boven maten ende natueren verhittende.
Beteringhe ende Bereydinghe
1 Die quaetheyt van Euphorbium wordt ghebeetert in veel manieren/ ende ierst als Mesue scrijft/ zoo salmen nemen Euphorbium vet gemaeckt met olie van sueten amandelen ende dat salmen tusschen dmiddelste van den citroenen in een pasteye van deech legghen ende alzoo die selve backen/ ende als die pasteye ghebacken sal sijn/ soo salmen dat Euphorbium uutnemen ende tot den ghebruyck der medecynen bewaeren.
2 Joannes Monardus neempt Mastix ende gummi Tragachanti tsamen/ alzoo veel als Euphorbium ende die menghelt hy tsamen ende steltse in dmiddel van een onghebacken broot/ ende laet die tsamen tot dat het broot ghenoch es/ backen/ ende dan neempt hy dat middelste uut ende maeckt daer pillen af die seer goet sijn tseghen die leemten van den pocken ende alle pijnen van den uutwendighe leden.
3 Een ander mengelt tot den Euphorbium alzoo veel Mastix ende maeckt daer af pillen met den sap van Citroenen oft Arangie appelen/ die hy seer tot der pestilentie prijst. |