[263] Cuele es een teer zoomer cruyt/ ontrent eenen voet hooch wassende/ sijn steelkens sijn dun ende bruyn/ met veel sijde tacxkens/ daer aen wassen cleyne smalle bladerkens. Den bladeren van die ghemeyne Hyssope wat ghelijck/ maer mindere. Die bloemen comen tusschen die bladerkens voort lijfvervwich/ wit ende liefelijck van ruecke. Tsaet es bruyn. Die wortel teer ende faselachtich.
Plaetse
Dit cruyt wordt al om in die hoven ghesayet/ ende in die spijse seer ghebruyckt.
Tijt
Dit cruyt bloeyet in Hoymaent.
Naem
Dit cruyt wordt nu ter tijt gheheeten in Griecx Saturon, Thymbra. In Latijn Cunila en Satureia. In die Apoteke Saturegia. In Hoochduytsch garten Hyssop/ zwibel Hyssop/ Kunel/ Saturey und Sadaney. Hier te lande Cuele/ Satureye/ Lochtekol. In Franchois Sariette en Sarriette. Onse meyninghe die wy van desen cruyde hebben/ ende dat wy voor die rechte Satureia houden/ salmen in onse Latijnsche aenteekeninghen verclaert vinden.
Natuere
Satureye es werm ende drooch/ tot in den derden graedt.
Cracht ende werckinghe
A Satureye als Dioscorides scrijft es van crachten ende werckinghen den Thymus ghelijck/ ende es seer goet bequaem ende ghesont in die spijse ghebruyckt.