Plaetse
[250] Dit cruyt wast hier te lande niet/ dan in die hoven der cruytliefhebbers daert gheplant oft ghesayet wordt.
Tijt
Die bloemen van Affodillen coemen in Aprill ende in Meye voort. in Braeckmaent wordt huer saet rijp.
Naem
Dit cruyt wordt in Griecx gheheete Asphodelus. In Latijn Albucus en Hastula regia. In die Apoteke Affodillus/ ende daer naer hier te lande onder die cruytliefhebbers Affodillen. Die bloemen van desen wordt gheheeten in Griecx Anthericos.
Natuere
Affodillen ende sonderlinghe die wortel/ sijn werm ende drooch van natueren tot in den tweeden graedt.
Cracht ende werckinghe
A Die wortelen van Affodillen ghesoden ende ghedroncken/ doen water maken ende die urine lossen/ ende verwecken den vrouwen huer natuerlijcke cranckheyt.
B Die selve wortel een vierendeel loots met wijn inghenomen/ is goet tseghen die pijne van der syden/ hoest/ crimpinghe der zenuwen ende spanninghe der leden ende tseghen die ghescuertheyt.
C Die selve wortel is oock seer goet tseghen die beet van den fenijnnighen ghedierten alsmen drije vierendeel loots swaer daer af met wijn drinckt/ ende die bladeren/ bloemen/ ende wortelen met wijn ghestooten op die wonde ende beet leyt.
D Tsaet van Affodillen ende die bloemen met wijn ghedroncken sijn oock goet tseghen fenijn van scorpioenen ende andere fenijnnighe ghedierten/ ende verwecken tot camerganck.
E Die wortel van Affodillen in droesem van wijn ghesoden is goet op die vuyle voortsetende sweeringhen gheleyt/ ende op die verouderde sweeringhen ende apostumatien van der vrouwen borsten ende van der manlijckheyt. Zy is oock goet tot die versche apostumatien met meel van gersten mout vermenght.
F Tsap van den wortelen met ouden goeden wijn ende wat myrrha ende Sofferaen tsamen ghesoden is een goede medecyne voor die ooghen/ scerpt ende verclaert het ghesichte.
G Tselve sap alleene oft met wieroock/ huenich/ wijn ende myrrha tsamen ghemenght gheneest die draghende ende loopende ooren/ ende is goet tseghen den tantsweer/ in die ooren ghedruypt van der sijden daer die pijne niet en is.
H Die asschen van der verbrande wortel/ gheneest die quade sweeringhen des hoofts/ daert hayr uut valt. Ende doet het hayr wederom groeyen alsmense daer op strijckt.
I Olie die in die wortel/ oft daer die wortel in ghesoden is/ is seer goet tseghen die verbrantheyt van den viere. Zy gheneest die Cackhielen/ ende versuet die pijne der ooren. |