Vingherhoet cruyt heeft langhe breede swertgruene bladeren die rontsomme wat ghekerft sijn den bladeren van wildt Wollecruyt wat ghelijck tusschen den welcken eenen rechten ronden steel voortcoemt een elle oft meer hooch/ daer aen van den middel tot boven toe/ ter syden wassen/ schoone langhe ronde hole bloemkens eenen Vingherhoet gelijckende/ van coluere som root van binnen met witte stipkens besprayet/ som geel. Als dese bloemkens gheresen sijn zoo verthoonen haer ronde bollekens die voor scerp sijn/ daer in lanck breet saet wast van smaecke seer bitter. Die wortel is swert met veele veeselinghen.
Plaetse
Dese bloemen wassen tot sommighe plaetsen ontrent den steenachtighen gheberchten/ in den vochtighen donckeren dalen/ ende daer men yser mijn ende smee colen vindt. Zy worden oock in die hoven hier te lande gheplant.
[216] Vingherhoetcruyt bloeyet meest in Hoymaent ende in Ooghstmaent.
Naem
Dit cruyt wordt nu ter tijt in Latijn gheheeten Digitalis, Campanula sylvestris, ende oock Nola sylvestris. In Hoochduytsch Fingherhut/ Fingherkraut/ waldt Glocklin en waldt Schell. Hier te lande Vingherhoetcruyt. In Franchois Gantz notre Dame.
Natuere
Dit cruyt is heet ende drooghe van natuere.
Cracht ende werckinghe
A Vingherhoetcruyt in water oft wijn ghesoden ende ghedroncken verdeylt ende doet sceyden alle grove taye vochticheden/ ende midts dyen opent die verstoptheyt van der lever/ van der milten ende van den inwendighen leden.
B Vingherhoetcruyt in der selver manieren oft met huenich water ghesoden ende ghedroncken/ suyvert ende purgeert die borst ende doet die taye fluymen lossen ende rijp worden.