[207] in huer schoonheyt bewaert moghen worden/ sonderlinghe als zy in eenen lauwen hoven ghedroocht worden. In dese aren wast het saet dat cleyn ende heel swert is.
2 Desen bloemen wordt noch een ghelijck gheslacht ghevonden/ dat neghen oft thien voeten hooch wast/ ende dit is van fatsoene den anderen ghelijck/ maer sijn bladeren sijn veel meerder. Die steelen dicker herder ende gheribt. Die aren dicker grooter ende menichfuldigher/ maer niet zoo schoon root oft liefelijcken int aensien/ noch oock niet gheduerich/ maer volcken huer coluer verliesende/ ende in groenicheyt veranderende als zy af ghepluckt zijn.
Plaetse
Beyde dese gheslachten van bloemen en wassen hiewr te lande niet/ dan in die hoven daer zy ghesayet worden.
Tijt
Beyde dese gheslachten brenghen huer aren in Ooghstmaent/ ende in Herfstmaent wordt het saet rijp.
Naem
Dese schoone aren worden van Plinius Amaranthus gheheeten/ ende nu ter tijt van den sommighen Flos Amoris, ende Amaranthus purpureus. In Hoochduytsch Samatblumen Floramor en Dausent schoon. Hier te lande Flouweelbloemen. In Franchois Passevelours.
Natuere
Dese bloemen sijn cout en drooghe van natueren.
Cracht ende werckinghe
Flouweelbloemen in wijn ghesoden ende ghedroncken stoppen den loop des buycx/ ende ghenesen dat root melizoen. |