Tfatsoen
[185] Penseen hebben drijcantighe teere steelkens met vele ledekens/ daer aen wassen swertgruene rontsomme ghekerfde bladerkens/ en tusschen dyen van den steelkens voortcomende cleyne bloote steelkens/ draghende schoone bloemkens/ in vijf bladerkens ghelijck die Violetten ghedeylt/ van coluere elck bloemken drijerleye/ ende meest aen die opperste bladeren bruyn violet peersch/ aen dandere blauw oft geelachtich met swerte streepkens overtoghen/ ende in dmiddel geel ende hayrachtich/ naer die welcke wassen ronde bollekens/ daer geel saet in besloten leyt.
Plaetse
Dese bloemen wassen in die hoven/ ende worden op vele coren velden tusschen die stoppelen ghevonden.
Tijt
Zy beghinnen te bloeyen corts naer die Violetten ende bloeyen voort alle den zoomer duer.
Naem
Dese bloemen worden in Griecx gheheeten Phlox ende Phlogion. In Latijn Viola flammea, Flamma / nu ter tijt/ Herba Trinitatis, Iacea ende Herba clavellata. In Hoochduytsch Freyssam/ Freyschamkraut/ Dreyfeltigkeyt blumen. In Neerduytsch/ Dreijfuldicheyt bloemen/ ende Penseen. In Franchois Pensees. |