Tfatsoen
[142] Dit cruyt heeft vele rechte stelen sonder bladeren/ daer aen ter sijden andere cleyne steelkens wassen/ ende dese steelkens hebben vele ledekens/ die lichtelijck van een sceyden/ ende als die
ledekens van een gheset sijn zoo es elck let een terwe coren van grootte ghelijck met een scerp puntken. Dit heel ghewas es vol saps ghelijck donderbaert maer wat sout en tsamen treckende van smaecke.
Plaetse
Dit cruyt wast aen die canten van der zee/ daer dwater somtijts overvloeyet.
Tijt
Dit cruyt wordt tzoomers ghevonden/ want tswinters zoo sterft dat cruyt ende blijft alleen die wortel duerende die tzoomers wederom nieuwe scuetkens voortbringht.
Naem
Dit cruyt wordt in Griecx ende in Latijn gheheeten Tragos/ ende van sommighen Scorpion oft Traganon/ ende anders gheen namen en sijn noch ter tijt bekent.
Natuere
Dit cruyt es cout drooghe ende stoppende van natueren.
Cracht en werckinghe
Thien ledekens van dese cruyde met wijn ghedroncken sijn goet die den loop des buycx hebben/ ende den vrouwen die huer natuerlijcke cranckheyt te veel hebben. |