Tfatsoen
[97] Wildt vlas heeft dunne taye bruynachtighe steelkens/ en daer aen veel by een wassende langhe smalle bladerkens/ den bladeren van vlas seer ghelijck. Die bloemen zijn geel/ voor breet ende gheslooten/ ghelijckende eenen Vorschen muyl/ achter smal en omghecromt/ ghelijck aen die Riddersporen. Tsaet es breet ende swert ende leyt in ronde bollekens/ die naer dat die bloemen gheresen zijn/ wassen.
2 Van desen gheslachte wordt noch een ander ghevonden/ dat niet ghemeyn en es/ dat schoone hemelblauw bloemen draeght/ anders den voorschreven ghelijck/ alleen van stelen ende bladeren minder en teerder.
Plaetse
Dit cruyt wast op ongheboude plaetsen/ by den haghen/ tuynen/ en canten van den velden.
Tijt
Het bloeyet meest in Hoymaent ende in Ooghstmaent.
Naem
Dit cruyt wordt in Latijn ende in Griecx Osyris gheheten. In die Apoteke Linaria/ en van sommighen Pseudolinum en Urinalis. In Hoochduytsch Lijnkraut Flaschkraut Harnkraut/ |