Tijt
[76] S. Jans cruyt bloeyet meest in Hoymaent ende in Ooghstmaent.
Naem
Sint Jans cruyt wordt gheheeten in Griecx/ in Latijn ende in die Apoteke Hypericum/ ende van sommighen Perforata en Fuga daemonum. In Hoochduytsch S. Johans kraut en van sommighen Harthauw. In Neerduytsch S. Jans cruyt. In Franchois Millepertuys.
Natuere
Van natueren es S. Jans cruyt werm en drooghe tot in den derden graet.
Cracht en werckinghe
A Sint Jans cruyt met saet en bloemen ghesoden ende ghedroncken/ lost die urine/ ende doet water maken/ ende es seer goet teghen den steen in die blase/ het brenght den vrouwen huer natuerlijcke cranckheyt weder/ ende het stopt den loop des buycx.
B In wijn ghesoden ende ghedroncken/ gheneeset ende verdrijft/ die derdedaechse ende vierdedaechse cortse.
C Tsaet veertich daghen inghenomen achter een/ gheneest die pijne en weedom in die hope/ diemen sciatica heet.
D Die bladeren ghestooten/ zijn goet gheleyt op die verbrantheyt/ die selve ghedroocht ende ghepoedert/ ghenesen die quade vuyle ende verouderde wonden en ulceratien/ alsment daer in stroyt. |