Tfatsoen
1 Dat ierste Melckcruyt heeft cleyn teere steelkens eenen halven voet hooghe/ veele van eender wortelen voortcomende/ daer aen cleyn lanckachtighe bladerkens wassen ghelijck den cleynen ende besonderen bladerkens van den linsen/ ende zijn van beneden witter dan van boven. Die bloemkens comen tusschen die bladeren voort/ van fatsoene den Felieren bloemkens ghelijck/ maer veel mindere/ purpurachtich ende lijfveurwich root van coluere. Die wortel es dun faselachtich ende voortcruypende.
2 Dat ander datmen Cruijsbloemkens nuempt/ es een cleyn cruydeken/ met dunne/ taye houtachtighe steelkens/ ontrent een palme lanck/ op der aerden cruypende/ met smalle cleyne bladerkens/ ghelijck den Linsen oft cleyne Hysope bladerkens becleet/ ende aen die selve dunne steelkens wassen cleyn bloemkens veel by een/ van grootte en fatsoene den Grysecoms bloemen niet seer onghelijck/ van vervwe som bruynpersch/ som hemelblauw/ en som sneewit/ sonder eenighen rueck ende als die afghevallen zijn zoo wassen daer breede teskens/ ghelijck aen Teskens cruyt/ maer mindere/ over beyde zijden met cleyn bladerkens/ ghelijck vlueghelkens bedeckt. Die wortel es dun en houtachtich.
Plaetse
Dat ierste Melckcruyt wast in soute neer waterachtighe plaetsen by die Zee gheleghen/ ende in Zeelant worddet al om veel ghevonden. Die Cruijsbloemkens wassen op dorre heyden/ en ontrent den weghen.
Tijt
Melckcruyt bloeyet in Braeckmaent ende Hoymaent. Cruijsbloemkens bloeyen in Meye/ ontrent den Cruijsdaghen/ ende daer omme worden zy Cruijsbloemkens gheheeten/ als Hieronymus Bock schrijft. |