Deel 6 Van der boomen, haghen, ende alle houtachtighe gewassen, en van huerder vruchten, gummen ende sapen ondersceet, fatsoen, naem, natuere, cracht ende werkinghe PlantenAlfabetisch
1644 Vlaams: Balsami succedaneum (balsem van verschillende sappen)
1616 Latijn: (balsem) Balsami succedaneum
Mastix es oock een gheslacht van Herst als Galenus ende Dioscorides scrijven/ ende onder alle Hersten/ dat edelste ende beste/ hy vloeyet uut den Lentiscus/ dwelck eenen schoonen hooghen boom es draghende uutghespreyde bladeren schier ghelijck die Esschen/ die vet ende in dat aentasten lijmachtich sijn. Ende desen Herst en es niet vochtich/ noch en vergaert niet tsamen ghelijck die andere/ maer blijft in vele cleyne stucxkens verscheyden/ die wit ende ontrent een terwen coren groot/ oft meerder sijn. Ende die beste Mastix es die in dat eylandt Chios ghewassen es/ ende die claer/ schoon/ wit/ broosachtich ende wel rieckende es.
[818] Dese edele ende costelijcke Herst wordt ghenaemt in Griecx Rhetine/ Schinine ende Mastiche/ In Latijn Resina, Lentiscina ende oock Mastiche/ In die Apoteken Mastix.
Natuere
Mastix es drooghe in den tweeden graedt ende werm in den iersten/ ende redelick tsamen treckende van natueren.
Cracht ende werckinghe
A Mastix es goet inghenomen tseghen dat bloetspouwen ende overgheven/ ende tot die loop des buycx ende dat root melizoen/ hy stelpt oock die overvloediche cranckheyt van den vrouwen/ ende alle bloetganck van waeren dattet sy.
B Mastix es een goede ende seer sonderlinghe medecijne voor die maghe/ hy sterckt die selve ende stilt dat braken ende
overgheven/ hy versuet alle weedom ende pijne ende maeckt lust ende appetijt om eten.