[680] In die Apoteke Macropiper.
2 Dat wit es genaemt Leucom peperi/ dat es in Latijn Piper album/ in die Apoteken Leucopiper.
3 Dat swert heet in Griecx Melan peperi. In Latijn Piper nigrum. In die Apoteken Melanopiper.
Natuere
Peper es werm ende drooghe tot in den derden graedt/ sonderlinghe dat wit ende swert/ want dat lanck en es alzoo drooghe niet/ aenghesien dattet veel vochticheyts in heeft.
Cracht ende werckinghe
A Peper in die sausen vermenght gheeft der spijsen goeden smaeck/ ende doet appetijt hebben ende die spijsen wel verteeren.
B Peper inghenomen doet oock water lossen/ ende tverdrijft die winden ende weedom van den buyck/ alsmen daer toe Laurus bladeren oft Comijn neempt. Item het es oock goet tseghen alle vergiftheyt ende tseghen alle beten ende steken van fenijnnige ende ghiftighe ghedierten/ ende daer om worddet oock in die Teriakele compositien vermenght.
C Peper voor daencomen van der cortsen ghedroncken/ oft met olie vermenght ende op tlichaem ghestreken beneemt die
huyveringhen ende die coude van den cortsen.
D Peper met huenich oft syrope gheleckt es goet tseghen den verouderden couden hoest ende tot alle coude sieckten van der borste ende longhene.
E Peper met Rosijnen gheknout treckt veele vochticheyt uut den hoofde ende suyvert die herssenen.
F Peper met huenich vermenght es oock goet op die squinantie ghestreken/ want het doet dat gheswil sceyden ende vergaen.
G Peper met peck vermenght verdrijft die croppen ende clieren/ ende alle coude herde gheswillen/ ende treckt uut die splinters ende dorenen.
H Peper ende sonderlinghe dat lanck es oock goet vermenght in die collyrien die dat ghesichte verclaren ende sterck maken. |