[676] Water Peper heeft ronde effene cale stelen/ met vele leden ende knoopen onder sceyden/ daer aen wassen langhe smalle bladeren/ den bladeren van Wilghen niet seer onghelijck/ die van smaecke heet ende scerp ghelijck Peper sijn/ aen opperste van den stelen/ tusschen die bladeren aen dunne steelkens comen die bloemen voort/ tsamen in een ghedronghen schier ghelijck aen die Melde/ die cleyn ende wit sijn/ ende als deese bloemkens geresen sijn/ zoo coemt daer bruyn breet saet voort/ dat oock heet op die tonghe es. Die wortel es veselachtich.
Plaetse
Dit cruyt wast hier te lande al om by den grachten poelen ende staende wateren/ ende in neere vochtighe plaetsen.
Tijt
Dit cruyt bloeyet meest in Hoymaent ende Ooghstmaent.
Naem
Dit cruyt wordt gheheeten in Griecx Hydropeperi. In Latijn Hydropiper. In Hoochduytsch Wasser pfeffer oder Muckenkraut. In Neerduytsch Water peper. In Franchois Curaige. In die Apoteken eest onbekent.
Natuere
Waterpeper es werm ende drooghe tot in den derden graedt.
Cracht ende werckinghe
A Die bladeren met den sade van Pepercruyt ghestooten verteeren ende doen vergaen die coude gheswillen ende die oude herdicheden/ ende doen oock sceyden dat gheronnen bloet ligghende onder tghene dat blauw gheslaghen oft ghestooten es/ daer op gheleyt.
B Die bladeren van Waterpeper ghedroocht ende ghepoedert sijn oock goet in die spijsen/ in plaetse van Peper ghebruyckt ghelijck dat Pepercruyt. |