Onder die gheslachten van Eppen/ zoo wordt van den ouders een Eppe bescreven die Berch eppe ghenaemt wordt. De welcke (al eest dat sy onbekent es) wy hier oock hebben willen bescrijven/ om dat hier niet en soude iet achtergelaten wesen dat den geslachten van Eppen aengaet/ ende oock omdat wy hopen/ dat dese Eppe te beter ghevonden sal moghen worden/ om dat wy die selve nu met hueren naem bekent maken. Dese Eppe seyt Dioscorides heeft dunne teere steelkens ontrent een spanne lanck/ daer aen cleyne tacxkens wassen met cleynen croonkens ghelijck aen Scheerlinck/ maer veel mindere/ daer op lanckachtich saet voortcoemt den sade van Comijn ghelijck/ dat dun/ seer wel rieckende ende scerp op die tonghe es.
Plaetse
Dit gheslacht van Eppe wast op hooghe berghen/ in ongheboude steenachtige plaetsen/ daer dattet Bercheppe ghenaemt wordt.
Naem
Dese Eppe wordt gheheeten in Griecx Oreoselinon. In Latijn Apium montanum/ dat es in Hoochduytsch Berch epffich. In Neerduytsch Berch eppe. In Franchois Ache des montaignes.
Natuere
Dese Eppe es van natueren den anderen oock ghelijck/ maer veel stercker als Galenus seyt.
Cracht ende werckinghe
A Tsaet ende die wortelen van Berch eppe met wijn inghenomen doen sterckelick water maken/ ende verwecken die natuerlijcke
cranckheyt van den vrouwen.
B Tselve saet es oock goet vermenght in alle Teriakele compositien ende medecynen die water doen lossen/ ende in alle die
verwermen.