[544] Hasenpootkens hebben ronde ghehayrde stelen/ daer aen bladeren wassen den ghemeyne Claverbladen seer ghelijck. Die bloemen wassen op dopperste van den stelen in saechte ghehayrde arenkens eenen saechten hasenpootken seer ghelijckende. Die wortel es cleyn ende hert.
Plaetse
Hasenpootkens sonderlinghe die cleyne wassen hier te lande op die corenvelden seer ghemeyn.
Tijt
Hasenpootkens wordt meest met bloemen ghevonden in Hoymaent ende in Ooghstmaent.
Naem
Dit cruyt wordt gheheeten in Griecx Lagopous. In Latijn Lagopus/ van sommighen Leoporis cuminum/ nu ter tijt Pes leporis/ ende Trifolium humile. In Hoochduytsch Hasenfusz/ Katzenklee/ Katzle. In Neerduytsch Hasenpootkens ende Hasenvoetkens. In Franchois Pied de lievre.
Natuere
Hasenpootkens sijn drooch tot in den derden graedt/ ende redelijcken cout van natueren.
Cracht ende werckinghe
A Hasenpootkens in rooden wijn ghesoden ende ghedroncken stopt den loop des buycx/ ende gheneest dat root melizoen.