Der Steenclaveren oft wilden Claveren die geele bloemen hebben vindt men hier te lande ghemeynlick al om twee gheslachten/ een met langhe hauwkens/ ende een sonder hauwkens.
[538]1 Dat ierste gheslacht van Steenclaveren es een neer wassende cruyt lancx der eerden cruypende. Die bladeren sijn den ghemeynen Claverbladeren wat ghelijck/ schier aschverwich gruen van verwen. Die bloemen sijn schoon geel ghefatsoeneert gelijck die bloemen van Erwten maer mindere. Ende als die vergaen zoo comen daer ronde hauwkens voort drye oft vier by een daer in rontdachtich saet wast. Die wortel es lanck ende roodachtich.
2 Dat ander gheslacht dat cleyn Steenclaveren ghenaemt wordt/ heeft ronde dunnen steelkens/ ende daer aen wassende bladerkens den Claverbladeren ghelijck. Die bloemen sijn geel ende wassen veel by een aen een ront bolleken/ ende vergaen in swerte cromme sadekens in swerte vellekens besloten/ die rontsomme die bollekens wassen al oft zy daer omme ghedraeyet waeren.
Plaetse
Beyde dese gheslachten van Steenclaveren wassen hier te lande op drooghe plaetsen/ ende aen die canten van den corenvelden/ ende by die weghen.
Tijt
Dese Claveren bloeyen van in Braeckmaent schier alle den zoomer duer/ ende leveren te wyle huer saet.
Naem
Dese Claveren worden nu ter tijt ghenaempt Loti sylvestris/ maer en sijn dat Lotus sylvestris niet daer Dioscorides af scrijft dat seer hooghe wast ende saet ghelijck Fenigrieck draeght.
[539] 1 Dat ierste gheslacht wordt ghenaempt in Hoochduytsch Wilden klee/ Steenklee/ Edeler steenklee/ Vogels wicken/ Onder frauwen schuchlin. Hier te lande Steenclaveren ende geel Steenclaveren/ wilde Claveren/ ende van sommighen oock Vogels vitsen. Ende wordt van sommighen ghehouwen voor een gheslacht van Melilotus. Ende daerom oock gheheeten in Latijn Melilotus sylvestris oft Melilotus Germanica.
2 Dat ander gheslacht wordt ghenaemt in Hoochduytsch geel Klee/ Kleiver/ Steenklee/ ende geel wisen klee. In Neerduytsch cleyn Steenclaveren/ ende cleyn geele Claveren. Ende dit schijnt wel te wesene een gheslacht van Medica/ daer af wy hier naer scrijven selen.
Natuere ende cracht
A Dese cruyden sijn cout ende drooghe van natueren/ ende tsamen treckende/ ende sonderlinghe dat ierste gheslacht/ ende daer om zoo machmense van buyten ende van binnen tslichaems ghebruycken tot alle sieckten ende ghebreken die vercoelens ende verdrooghens behoeven.