[507] daer die are mede bedeckt es uutsluypen ende huer laten sien tseghen dat die aren rijpen. Het coren dat aen die aren wast/ es ontrent een erwte groot/ van buyten som bruyn/ som root/ som geel/ som wit/ van binnen wit ende suet van smaecke/ ende wast rontsomme die aren in ordene in acht neghen oft thien regelen gheset.
Plaetse
Dit coren wast in Torckien/ daert in dieren tijden ghegheten wordt/ ende van daren eest hier te lande ghecomen/ ende wordt voor een nieuwigheyt in der cruytliefhebbers hoven ghesaeyet/ het selve wast oock in Indien en van daeren eest in die tijden van Keyser Nero tot Roomen ghebrocht gheweest als Plinius scrijft.
Tijt
Dit coren wordt in Aprill ghesaeyet/ ende in Ooghstmaent eest rijp.
Naem
Dit coren wordt gheheeten van Plinius Milium Indicum/ nu ter tijt Frumtentum Turcicum ende Frumentum Asiaticum. In Hoochduytsch Turcken korn. Hier te lande Torcksch coren. In Franchois Bled Sarrazin.
Natuere ende cracht
A Die natuere ende cracht van desen coren en es noch niet sekerlijck ondervonden.
B Dat broot dat van desen coren ghemaeckt wordt es drooghe ende hert luttel vetticheyts inhebbende waer uut goet te mercken es dattet seer luttel voetsels by brenght ende quaet om verteeren es/ ende gheen ghelijckenisse met den Terwen broode en heeft als sommighe dwaselick meynen. |