Plaetse
[480] 1 Dat Solanum somniferum wast als Dioscorides seyt in steenachtighe plaetsen/ niet veerde van die zee gheleghen.
2 Dat Solanum manicum wast op hooghe berghen daer die sonne veel schijnt.
Naem
1 Dat ierste gheslacht van desen tween wordt gheheeten in Griecx Strychnon hypnoticon. In Latijn Solanum somniferum/ dat es in Duytsch Slaepmakende Nascaye/ van sommighen oock Halicacabon, Dircion, Apollinaris minor, Ulticana herba, ende Opsago.
2 Dat ander heet in Griecx Strychnon manicon. In Latijn Manicum Solanum/ dat es/ Rasernie makende oft dulheyt makende Nascaye/ van sommighen Persion Thryon Anydron Pentadryon ende Enoron.
Natuere
1 Solanum somniferum es cout tot in de derden graedt volcomelijck den Opium van natueren wat ghelijck maer veel onstercker.
2 Die wortel van Solanum manicum sonderlinghe die scorsse es drooghe tot in den derden graedt/ ende cout tot in den tweeden/ als Galenus scrijft.
Cracht ende werckinghe
1
A Die vruchten van Solanum somniferum inghenomen doen water maken/ ende sijn den watersuchtighen seer goet ghebruyckt/ maer en moghen over die twaelf tseffens niet inghenomen worden/ want alsser meer inghenomen worden soo sijn sy scadelick.
B Tsap van desen besien es goet in die medecijnen vermenght/ diemen ingheeft tot versuetinghe van weedom ende van pijne.
C Tselve sap in wijn ghesoden ende in die mont ghehouden versuet die pijne van den tanden.
2
D Die wortel van Solanum manicum sonderlinghe die scorsse daer af es seer goet ghewreven ende ghelijck een plaester gheleyt op dat wilt vier ende op die quade heete voorts etende sweeringhen ende ulceratien.
E Van binnen en dient dit Solanum niet om te ghebruyckene.
Hindernisse
1 Meer dan twaelf vruchten van Solanum somniferum inghenomen maken rasernie ende ydelheyt van hoofde volnaer ghelijckende dat Opium.
2 Die wortel van Solanum manicum een drachma swaer met wijn ghedroncken maeckt lichticheyt ende ydelheyt van hoofde/ ende twee drachma swaer doet die ydelheyt meerder wesen ende drije oft vier daghen lanck dueren. Die selve wortel vier drachma swaer inghenomen doodet den mensche. |