[420] Arabeusch Sena gheheeten/ ende
met dyen naem eest in die Apoteke ende in Duytsch ende in Franchois bekent.
2 Dat ander geslacht heet van Theophrastus in Griecx Coloutea. In Latijn Colutea. In Hoochduytsch Welsch linsen. Hier te lande Lombaertsche Linsen. In Franchois Baguenaudier.
Natuere
Senebladeren sijn werm tot in den tweeden graedt ende drooghe tot in den iersten.
Cracht ende werckinghe
A Die hauwkens ende bladeren van Sena een vierenCruijdeboeck deel loots swaer inghenomen verwecken tot camerganck ende iaghen af
taeye coude fluymen ende geele vochticheden/ maer meest ende sonderlinghe die swerte swaere melancholijcke humoeren.
B Tselve doen sy oock in hoendersop/ oft sop sap van erweten of andere dyerghelijcke
vochticheyt ghesoden ende ghedroncken.
C Senebladeren sijn goet in deser manieren ghebruyckt den ghenen die swaermoedich/ droevich ende sonder saecke vervaert oft
verscrickt sijn ende alle den melancholieusen/ ende die met eenighe vallende sieckte besmet sijn/ ende sijn goet tot alle verstoptheyt van der lever ende sonderlinghe van der milten/ tot hooftsweer/ crauwagien ruydicheyt ende melaetsheyt. In summa purgatie met Senebladeren ghemaeckt dien tot alle sieckten van swaeren melancholieusen/ ende verbranden oft souten humoeren oorspronck hebbende.
Verkiesinghe
Die hauwkens als Mesue seyt sijn die bequaemste tot den ghebruyck der medecynen ende daer naer die bladeren/ die stelen ende rijskens sijn niet bequaem.
Hindernisse
Sene maeckt winden/ crimpsel ende berueringhe in den buyck ende es seer traech van wercke.
Beeteringhe
Tot die Sena salmen toedoen Anijs saet/ Gengebeer ende wat Sal gemma. Oft die selve sieden met saet van Anijs/ Rosijnen ende wat Gengebeers. Ende in dyer manieren inghenomen zoo selen zy sonder eenich belet lichtelijcken wercken. |