1554/1557: Hornungsblumen (weisz), Leucoïon, Leucoïon de Théophraste, Soomersottekens, Sporckelbloemen (witte), Tydeloosen (witte), Viola alba, Viola alba Theophrasti, Violette blanche
Dese schoone liefelijcke bloemkens hebben smalle bladerkens minder ende saechter dan die bladeren van Pareye anders huer gelijck. Die stelen sijn ront/ effen ende daer op wassen schone welrieckende witte bloemkens aen dopperste van den stelen nederwaerts hanghende. Ende elck van desen bloemkens heeft sesse smalle bladerkens die van buyten met gruene streepkens overtoghen en van binnen heel wit sijn/ in dmiddel van den welcken sesse geele droppelkens hanghen/ ghelijck in die Lelien/ dyen dese bloemkens volnaer van fatsoene ghelijcken. Naer die bloemen zoo comen daer ronde bollekens voort/ daer in ront geel effen saet leyt/ den Hofmostaerts sade niet seer onghelijck. Die wortel is ront ghelijck die wortel van den geele Sporckelbloemen.
Plaetse
Dese Sporckelbloemen wassen in donckere vochtighe plaetsen/ ende in neere bosschen by dwater gheleghen/ zy worden oock in die hoven gheplant.
Tijt
In Sporckelle comen dese bloemkens voort/ met den geelen Sporckelbloemen zy leveren huer saet in Aprill/ in Meye vergaen bladeren ende die steelen/ alleen die wortele blijft in der aerden duerende/ ghelijck van die andere geele Sporckelbloemen.
[249] Dese schoone bloemkens worden nu ter tijt ghehouwen voor een gheslacht van Violetten/ dat van Theophrastus gheheeten wordt in Griecx Leucoion/ dat is in Latijn Viola alba. Ende daer om worden zy nu ter tijt Leucoion ende Viola alba Theophrasti ghenaempt. In Hoochduytsch heeten dese bloemkens Weisz hornungsblumen. Hier te lande witte Sporckelbloemen/ Soomersottekens/ ende witte Tijdeloosen. In Franchois Violette blanche.
Natuere ende cracht
A Natuere ende werckinghe van desen bloemkens en is noch ter tijt niet bekent