[242] Heydens bloeme heeft eenen rechten ronden steel/ met langhe bladeren becleet/ daer boven aen wassen ende voortcomen schoone liefelijcke bloemkens de Lelien van fatsoene seer ghelijck/ in sesse bladerkens verdeylt die dick ende vet sijn en ghelijck ringeskens uutwaerts omghecromt/ ende dese bloemkens sijn bleeck/ lijfvervwich van coluere/ met cleyne tipkens besprayet/ ende en hebben gheenen sonderlinghen rueck. Die wortel is den Lelie wortelen gelijck maer mindere ende gout geel.
Plaetse
Dese bloemen wassen tot sommighe plaetsen in Duytschlant in die bosschen ende beempden die op die gheberchten ligghen. Hier te lande worden sy in die hoven gheplant.
Tijt
Heydens bloemen bloeyen in Meye ende in Braeckmaent.
Naem
Dese bloeme heet in Griecx Hemerocallis. In Latijn Lilium sylvestre. Tot sommighe plaetsen in die Apoteken Affodillus/ ende voor die rechte Asphodelus niet sonder groote dwalinghe ghebruyckt. In Hoochduytsch Goldtwurtz und Heidnischblumen. Hier te lande Lelikens van Calvarien/ Heydens bloeme ende wilde Lelien. In Franchois Lys sauvage.
Natuere
Galenus scrijft dat die wortelen van deser bloemen/ den wortelen van witten Lelien van natueren ghelijck sijn.