Tfatsoen
[194] Christus ooghen hebben ronde wollachtighe gheknoopte stelen/ daer aen uut elk let wassen twee lange saechte wollachtighe bladeren. Den bladeren van Wollebladeren ghelijck/ maer veel minder ende smalder. Die bloemen wassen op dopperste van den stelen uut langhachtighe gheribde huyskens/ ende sijn van coluere som schoon root/ som wit van fatsoene die enkel sijn in vijf oft ses bladerkens ghesneden met scerpe puntkens die in dmiddel van der bloemen vergaren. Ende als dese bloemen vergaen zoo wast in die huyskens een ront lanck bolleken daer in dat saet leyt dat bruyn es. Die wortel es lanck en dun.
Plaetse
Dese bloemen worden hier te lande in die hoven gheplant.
Tijt
Zy bloeyen in Braeckmaent Hoymaent ende Ooghstmaent.
Naem
Dese bloemen worden gheheeten in Griecx Lychnis stephanomatice/ In Latijn Lychnis coronaria/ ende Lychnis sativa/ van sommighe Athanaton en Acylonium. In Hoochduytsch Margenroszlin/ ende Marienrosen/ ende daer naer nu ter tijt oock in Latijn Rosa Mariana. Hier te lande worden zy meest Christus ooghen ghenaempt.
Natuere
Dese bloemen sijn van natueren werm ende drooghe.
Cracht en werckinghe
A Tsaet met den bloemen/ oft elck alleen met wijn ghedroncken/ es goet tseghen die beet van den scorpioenen. |