Tfatsoen
[173] Dit cruyt heeft breede rondachtighe bladeren met acht of neghen hoecken rontsomme ghelijck een saghe ghekerft/ die in dierste uutcomen tsamen ghevouwen ende gheployt sijn. Tusschen den welcken wassen ronde steelkens/ eenen voet lanck/ met cleyne bladerkens beset/ op tsop van den welcken wassen cleyne ghehoopte gruengeele bloemkens/ cleyn geel sadeken/ niet grooter
dan Huelsaet/ in gruen huyskens besloten voortbringhende. Die wortel es dick/ vinghers lanck/ van buyten bruyn met vele veeselinghen.
Plaetse
Synnaw wast in sommighe plaetsen hier te lande/ op sommighe vochte beempden aen die gheberchten hanghende/ daer leemachtighe vette ende roode aerde es.
Tijt
Dit cruyt bloeyet in Meye ende in Braeckmaent.
Naem
Dit cruyt wordt in Latijn gheheeten Alchimilla, Achimilla, Planta Leonis, Pes Leonis/ ende van sommighen in Griecx Leontopodion/ hoe wel nochtans dat recht Leontopodion niet en es daer Dioscorides af scrijft. In Hoochduytsch Synaw/ Lewenfuz/ Lewentapen/ Onder frauwen mantel/ en grosz Sanickel. Hier te lande naer die Hoochduytsch namen/ Synnaw/ onser vrouwen mantel/ ende groote Sanikel. In Franchois Pied de lyon. |