Tijt
[166] Wintergruen wordt winter ende zoomer ghevonden/ maer sijn bloemen comen in Braeckmaent ende in Hoymaent voort.
Naem
Wintergruen heet in Griecx Limonion ende van sommighen als Plinius scrijft Neuroides oft Nomoides. In Latijn Limonium, Beta sylvestris/ en Tintinabulum terrae. In die Apoteke Pyrola. In Hoochduytsch Wintergrun/ Holtzmangoldt/ Waldt Mangoldt. In Franchois Limoire ou bette sauvage.
Natuere
Wintergruen es drooghe van natueren tot in den derden graet ende cout tot in den tweeden.
Cracht en werckinghe
A Tsaet van Wintergruen een lepelken vol met wijn ghedroncken gheneest dat root melizoen ende alle loop des buycx/ ende stopt dat bloet spouwen/ ende der vrouwen overvloedighe natuerlijcke cranckheyt ende alle bloetganck.
B Die bladeren van Wintergruen alleen oft met andere ghelijcke wondecruyden in wijn ghesoden ende ghedroncken ghenesen niet alleen die inwendighe quetsueren/ maer oock alle uutwendighe wonden/ fistulen ende quade sweeringhen.
|