Aethiopis heeft groote breede wollachtighe bladeren ghelijck die bladeren van Wollecruyt/ maer rouwer ende wollachtigher/ ende niet zoo ront om die canten maer meer cantich/ die rontsomme op der aerden uutghespreyt ligghen/ tusschen die welcke voortcoemt eenen viercantighen rouwen wollachtighen steel/ die hem in seer veel andere stelen verdeylt/ ende daer aen wassen lancx die stelen veel witte bloemen den bloemen van dooven Netelen schier ghelijck/ maer veel meerder. Die wortel es lanck ende dick ghelijck die wortelen van Wollecruyden.
Plaetse
Dit vremt cruyt en wast hier te lande niet dan in der cruytliefhebbers hoven.
Tijt
Aethiopis bloeyet in Meye.
Naem
Dit cruyt wordt gheheeten in Griecx ende in Latijn Aethiopis/ ende anders gheenen naem es ons bekent.
[153] Aethiopis es middelmatich werm ende drooghe van natueren.
Cracht en werckinghe
A Aethiopis es goet den ghenen die dat pleuresis hebben/ ende op die borste met etter verladen sijn. Item den ghenen die in die keele eenighe rouwicheyt hebben/ ende dijsghelijck oock die van dat Sciatica sieck sijn/ alsmen die wortel ziedt ende drincket.
B Tot die selve ghebreken van der borste ende van der longhen es die wortel van Aethiopis oock goet alsmense met huenich vermenght ende dicwils daer af lect.