[105] Ganserick es met sijnen cruypende ende aen die aerde hakende rancxkens den Aerdtbesien cruyde ende den Vijfvinghercruyde seer ghelijck/ het heeft teere dunne steelkens ende daer aen wassende lanckachtighe gheveerde seer ghespleten ende rontsomme ghekerfte bladeren/ den bladeren van Agrimonie seer ghelijck/ die op die eene syde ter aerden waerts aschvervwich wit sijn/ ende op die ander syde heel gruen. Die bloemen sijn geel/ den bloemen van Vijfvinghercruyt seer ghelijck. Die wortel es veeselachtich.
Plaetse
Ganserick wast op grasachtighe vochtighe ongheboude plaetsen/ en by die grachten.
Tijt
Het bloeyet meest in Braeckmaent ende in Hoymaent.
Naem
In Latijn wordt dit cruyt nu ter tijt gheheeten Potentilla en Argentina/ en van sommighen Agrimonia sylvestris oft Tanacetum sylvestre. In Hoochduytsch/ Grensich/ Grensing/ oft Genserich/ ende daer naer in Latijn Anserina. In Neerduytsch Ganserick en Argentine. In Franchois Argentine/ bec dOye/ ou Tanaise saulvage.
Natuere
Ganserick es drooghe van natueren tot in den derden graet.
Cracht en werckinghe
A Ganserick in wijn oft water ghesoden ende ghedroncken/ stopt den loop des buycx/ dat roode melizoen ende alderhande bloetganck/ ende es seer goet tseghen die overvloedighe vrouwelijcke cranckheyt en sonderlinghe tseghen die witten vloet.
B Dit selve cruyt met water in sout ghesoden ende ghedroncken/ doet dat gheronnen bloet sceyen/ en es goet ghedroncken die van hooghe gevallen sijn.
C Dwater daer Ganserick inne ghesoden es/ es goet voor die sweeringhen van den mont/ roode loopende ooghen/ ende verergerde wonden/ alsmense daer mede waschst. |