[78] Androsemon es Sint Jans cruyt ende den Herthoy wat ghelijck/ het heeft veele ronde stelen uut eender wortel voortcomeende/ daer aen wassen bladeren die veele meerder zijn dan die bladeren van S. Jans cruyt/ daer uut wijachtich sap coempt/ als zy ghewreven worden. Boven aen dopperste vanden stelen wassen cleyn ronde knoppekens oft bollekens/ die opengaende/ bloemen
bringhen den bloemen van S. Jans cruyt ghelijck/ maer meerdere/ ende als die vergaen zoo volghen daer wederom ronde bollekens naer die ierst schoon root/ en als zy rijp zijn/ bruyn root schier swert ende ghelijck verdrooght bloet van coluere worden/ ende daer inne wast cleyn bruyn sadeken. Die wortel es hert en houtachtich/ ende spruyt alle iaer van nieuws uut.
Plaetse
Dit cruyt wast hier te lande niet dan in die hoven daer tgesayet en gheplant wordt.
Tijt
Het bloeyet in Hoymaent/ ende in Ooghstmaent wordt sijn saet rijp.
Naem
Dit cruyt heet in Griecx ende in Latijn Androsaemon. In die Apoteke eest onbekent. In Duytsch en hevet ghenen naem die bekent es.
Natuere
Tes werm ende drooghe ghelijck Herthoy/ ende S. Jans cruyt.
Cracht en werckinghe
Tes van crachten ende werckinghe den Herthoy ghelijck/ als Galenus schrijft. |