Tfatsoen
[44] Sterrecruyt heeft eenen bruynen hayrachtighen/ houtachtighen steel/ met lanckachtighe dicke hayrachtighe swertgruene bladeren. Op tsop van den steelen wassen drije oft vier schoone bloemen/ van fatsoene den Chamille bloemen ghelijck/ die in dmiddel geel zijn ende rontsome met purpur blauw bladerkens/ ghelijck een sterreken beset ende gheciert zijn/ die ten laetsten in grijs hayre veranderen ende wech vlieghen. Die wortel es veeselachtigh.
Plaetse
Sterrecruyt wast op heuvelen en berghen aen hooghe dijcken/ somtijts in die bosschen ende in sommighe beemden by den Rhijn stroom gheleghen.
Tijt
Het bloeyet het meest in Ooghstmaent.
Naem
Dit cruyt heet in Griecx Aster atticos en Boubonion/ In Latijn Aster atticus, en Inguinalis, In der Apoteken eest onbekent/ In Hoochduytsch Megercraut/ Bruchkraut/ Scarten kraut ende stern kraut/ In Franchois Aspergoutte menue.
Natuere
Sterren cruyt es vercoelende/ den Roosen van natueren volnaer ghelijck.
Cracht en werckinghe
A Sterrecruyt es seer goet van buyten op die maghe gheleyt/ die verhit ende onsteken es/ ende teghen die clappooren en sweerende clieren in die eeghenisse gruen ghestooten/ ende daer op gheleyt.
B Tes oock goet tot roodicheyt en hitte der ooghen/ en teghen dat uutgaen van den achterderm.
C Dat blauw van den bloemkens met water ghedroncken/ helpt die kinderen die met die squinancie en vallende sieckte ghequel |