[34] liever. In Franchois Ive muscate.
Natuere
Velt cypressen zijn werm in den tweeden graet/ ende drooghe tot in den derden.
Cracht en werckinghe
A Die bladeren van Chamepitijs seven daghen in wijn/ ghedroncken/ gheneest die geele sucht/ ende veertich daghen met meede ghedroncken zoo zijn zy goet teghen dat sciatica/ dat es weedom in die hope.
B Chamepitijs es oock seer goet teghen verstoptheyt van der levere/ en doet die urine rijsen/ ende zy brenght den vrouwen huer natuerlijcke sieckte weder.
C Ende gruen ghestooten ende met huenich ghemenghelt en op groote wonden/ quade en vuyle sweringhen gheleyt/ heylt ende gheneest die selve.
D Sy es oock goet teghen die hertheyt van die vrouwen borsten/ gruen ghestooten ende daer op gheleyt.
E Ende in dijer manieren ghebruyckt/ es zy seer goet gheleyt op die beten en steken van slanghen/ nateren ende dijer ghelijcken fenijnighe ghedierten.
F Chamepitijs oock ghesoden ende ghedroncken/ doet dat ghestolt bloet scheyden ende afgaen/ ende met eedick ghesoden ende ghedroncken/ doet zy die doode vrucht afgaen.
G Tsap van Chamepitijs/ den mensche op tlijf ghestreken doet hen seer sweeten.
H Dijsghelijck cra(c)ht ende werck doen oock dat tweede en tderde/ maer en sijn niet zoo sterck ende crachtich als dat ierste. |